GIKUNDIRO|LIVE:Uzibeshya akankubita nzamwica ajye morgue-PEREZIDA WA RAYON!

ABARAYON:Perezida wa Rayon Sports yateguje urupfu umufana uziha ibyo kumukubita.Perezida wa Rayon Sports, Capt (Rtd) Uwayezu Jean Fidèle, yateguje abafana b’iyi kipe ko uzagerageza kumukubita azisanga mu buruhukiro bw’ibitaro.

Story by Kalain -Patrick NGANJI

Uwayezu yabitangaje kuri uyu wa Mbere tariki ya 15 Mutarama, mu kiganiro yagiranye n’abanyamakuru.

Ni nyuma y’uko mu mpera z’icyumweru gishize ubwo Rayon Sports yari imaze gutsindwa na Gasogi United ibitego 2-1, bamwe mu bafana ba Rayon Sports hashatse gusagararira Namenye Patrick usanzwe ari Umunyamabanga Mukuru w’iyi kipe.

SG Namenye ashinjwa na bamwe mu ba-Rayon kuba nyirabayazana y’umusaruro mubi ikipe yabo imaze igihe ibona, ku mpamvu zo kuba ngo ari we ugira uruhare mu gusinyisha abakinnyi badashoboye.

Capt (Rtd) Uwayezu mu kiganiro n’abanyamakuru, yateguje umufana uzagerageza kumukubita ko azisanga muri ’morgue’.

Ati: “Gukubita Perezida Jean Fidèle na Patrick ngo ni uko ikipe itsinzwe mu kibuga? 1994 murayibuka? Indege yaraguye bica Abatutsi barenga miliyoni. None Rayon Sports kubera ko ngo dutsinzwe, bakazamuka ngo Jean Fidèle na SG ngo badukubite? Muri Stade muri VIP?”.

“Iyo bahansanga bakankubita! Nava aho njya muri Polisi kuvuga ngo nakoze ibi kubera self-defence (kwirwanaho) cyangwa provocation (ubushotoranyi). Ariko unkubise wahava ujya muri ’morgue’.”

Perezida Uwayezu yavuze ko mu gihe u Rwanda rugezemo bitumvikana ukuntu umuntu apanga gukubita undi ngo ni uko ikipe yatsinzwe.

Yavuze ko ibi byose byabayeho mu gihe ubuyobozi bukora ijoro n’amanywa kugira ngo ikipe itere imbere.

Yunzemo ati: “Buriya APR FC nitsindwa abafana bazajya gufata Col Richard [Karasira] bamukubite? Aba Gorilla bazazamuka bafate Hadji [Mudaheranwa] bakubite? Cyangwa aba Gasogi bafate KNC? Bazaze! Iki gihe muri Stade yo muri uru Rwanda? Turatsinzwe ngo urakubita Patrick?”

Uwayezu yikomye bamwe mu bahoze muri Rayon Sports kuba ari bo bayitezamo umwuka mubi, bijyanye no kuba ’injyawuro’ bayikuragamo batakiyibona.

Yavuze ko aba ari bo birirwa bategura amanama abera mu bice bitandukanye by’igihugu (yavuze kuri La Galette no kwa Kamali kuri Tam tam) mu rwego rwo guteza umwiryane muri Murera.

Please follow and like us:
Pin Share

Leave a Reply

Your email address will not be published. Required fields are marked *

YouTube